АҚШ президенти Дональд Трамп маъмуриятидаги энг таъсирли, аммо омма эътиборидан йироқ бўлган шахслардан бири — Серхио Горнинг аслида Тошкентда туғилгани аён бўлди. Бу ҳақда OCCRP ва Times of Malta нашрлари расмий нотариал ҳужжатларга таяниб хабар берди.
1986 йил 30 ноябрь куни Тошкентда дунёга келган Серхио Гор туғилган пайтда Сергей Гороховский деб аталган. Бу исм ҳозиргача айрим расмий ҳужжатларда, жумладан, унинг 2021 йилда Малтанинг Коспикуа шаҳрида 255 минг еврога сотиб олган уйига оид ҳужжатларда сақланиб қолган.
Йиллар давомида сир тутилган факт
Серхио Горнинг айнан қаерда туғилгани узоқ вақт сир сақланиб келинган. Ҳатто 2024 йил декабрь ойида The Washington Post уни Трампнинг “янги кадрлар сиёсати”даги “таъсирли, аммо кўзга кўринмас архитектор” деб атаган бўлса-да, унинг ватани ҳақида аниқ маълумот бера олмаган эди. Айрим манбалар уни “Малтадан чиққан муҳожир” деб таърифлаган бўлса-да, бу даъволар ҳеч қандай ҳужжатлар билан асосланмаган эди.
Эндиликда эса ишончли манбалар орқали Гор болалигининг бир қисмини Малтада ўтказгани ва у ерда 1996–1999 йилларда De La Salle Cоллегеда ўқигани маълум бўлди. Бу мактабдаги архивлар унинг туғилган санасини ҳам тасдиқлаган.
Тошкентдан Вашингтонгача
Серхио Гор АҚШга болалик чоғида кўчиб ўтган. Онаси эса Исроил фуқаролигини олиб, 1994 йилда Малтада компания ташкил этган. Айнан шу компания орқали мулк сотиб олинган ва кейинчалик бу уй Серхио Горга ўтган.
Гор сиёсий фаолиятини АҚШда бошлаб, дастлаб сенатор Ранд Пол билан ишлаган. 2020 йилда эса Доналд Трампнинг “Ғалаба молия қўмитаси”ни бошқарган. Шунингдек, у Трамп оиласига яқин бўлган Winning Team Publishing нашриётига ҳам асос солган.
Россия билан ришталар: Шубҳали сафарларми?
OCCRP манбаларига кўра, Серхио Гор бир неча бор Россияга сафар қилган. У 2018 йилда сенатор Ранд Пол билан бирга Cato Institute ташаббуси билан Москвада бўлган. Бундан ташқари, 2017 йилда ҳам у “Аэрофлот” орқали Москвага учиб келиб, эртаси куни Римга учиб кетгани қайд этилган.
Бироқ унинг адвокати Роберт Гарсон бу борадаги даъволарни рад этиб, “Бу оддий транзит сафар эди. Москвада ҳеч қандай расмий учрашув бўлмаган. Бу борадаги айбловлар — ёлғон ва туҳмат”, — дея изоҳ берган.
Ким ўзи Серхио Гор?
Жамоатчилик назаридан йироқда бўлса-да, Серхио Гор АҚШ сиёсатида муҳим ўрин тутади. Унинг Тошкентда бошланган ҳаёти бугун Вашингтондаги куч марказларига уланмоқда. Бугун журналистлар унинг сирли ўтмиши ва сиёсий таъсирини бирин-кетин очиб бермоқда.
