Агар Қўшма Штатлар ҳарбий ёрдамни тикламаса, Украинада ўқ-дори захиралари фақат ёз охиригача етади. Бу ҳақда Германиянинг Bild нашри ҳарбий эксперт Карло Масалага таяниб хабар берди.
Экспертнинг айтишича, АҚШ ва Европанинг қурол-яроғ етказиб бериши Украина учун ҳал қилувчи аҳамиятга эга. “Европа бу бўшлиқни тўлдиришга уринмагунча, жиддий танқислик юзага келади”, – дея огоҳлантиради у.
Bild маълумотига кўра, айниқса Patriot PVO тизимлари учун ракеталар ва GMLRS ракеталарини етказиб беришнинг тўхтатилиши Украина Қуролли Кучлари учун оғир оқибатларга олиб келиши мумкин. Чунки ушбу ракеталарсиз HIMARS тизимлари деярли бефойда бўлиб қолади.
1 июль куни Politico газетаси АҚШ ўз захиралари тугагани сабабли Украинага баъзи зенит ракеталари, юқори аниқликдаги ўқ-дорилар ва артиллерия снарядларини етказиб беришни тўхтатганини ёзган эди.
Washington Post эса бу қарор Украина амалдорларини кутилмаганда ҳайратга солганини билдирди.
