Украина Президенти Владимир Зеленскийга кўра, АҚШ билан ҳарбий ёрдам, жумладан, ҳаво ҳужумидан мудофаа (ПВО) тизимларига оид барча тафсилотлар ҳозирда аниқлаштирилмоқда. Бу баёнот АҚШнинг Киевга мўлжалланган зенит ракеталари ва юқори аниқликдаги ўқ-дорилар етказиб беришни кутилмаганда тўхтатгани ҳақидаги хабарлардан сўнг янгради. Зеленский Мудофаа ва Ташқи ишлар вазирларидан бу борада ҳисобот олганини билдирди.
Вашингтонда эса бу ҳолат кенг кўламли эмаслиги таъкидланди. АҚШ Давлат департаменти вакили Темми Брюснинг айтишича, “Биз Украинага қурол етказиб беришни бутунлай тўхтатмадик. Бу фақат битта ҳолат, битта қарор. Пентагон ва бошқа тузилмалар Украина масаласида ҳали ҳам фаол ҳаракатда”.
Брюс, шунингдек, Киевга Patriot тизимлари учун ракеталар етказилиши давом этишини маълум қилди.
Аввалроқ The Wall Street Journal нашри АҚШ Мудофаа вазирлиги захираларининг камайиб бораётгани сабабли Пентагон зенит ракеталари ва ўқ-дорилар жўнатилишини музлатиб қўйганини хабар қилган эди.
Улар орасида Полшада сақланаётган, Украинага юборилиши режалаштирилган қуроллар ҳам борлиги айтилган. Мазкур қарор АҚШ мудофаа вазири ёрдамчиси ўринбосари Элбридж Колби томонидан июнь бошида илгари сурилган.
