Озарбайжон пойтахти Бокуда Россияга қарашли “Спутник Озарбайжон” ахборот агентлиги офисида тинтув ўтказилди. Натижада агентликнинг бош муҳаррири Игор Картавйх ва бош муҳаррир ўринбосари Евгений Белоусов ҳибсга олинди.
Маҳаллий “Минвал” нашрига кўра, улар Россия Федерал хавфсизлик хизмати (ФСБ) ходимлари бўлиб, Озарбайжонда журналист қиёфасида фаолият юритган.
Шу куннинг ўзида “Спутник” офисидаги тинтувни суратга олаётган “Руптлй” ахборот агентлиги мухбири Айтекин Гусейнова ҳам қўлга олингани ҳақида агентлик унинг онасига таяниб хабар берди.
Воқеа Россия ва Озарбайжон ўртасидаги кескинлашаётган муносабатлар фонида юз бермоқда. Маълумки, бир неча кун аввал Россиянинг Екатеринбург шаҳрида бир гуруҳ озарбайжонликлар қотилликда гумонланиб қўлга олинган, улардан икки нафари тергов вақтида вафот этган. Озарбайжон ҳукумати бу ҳолат юзасидан расмий норозилик билдирган эди.
Эслатиб ўтамиз, “Руптлй”— бу Россиядаги давлат пропагандасига хизмат қилувчи RT (Россия Today) телеканалининг бўлинмаси бўлиб, “Россия Бугун” медиа ҳолдинги таркибига киради. Шу ҳолдинг доирасида фаолият юритувчи яна бир йирик тармоқ — Спутник агентлиги ҳисобланади.
Озарбайжон расмийлари воқеа юзасидан ҳозирча расмий баёнот бермаган. Бироқ маҳаллий нашрлар бу ҳибслар ва тинтувларни Озарбайжон ички хавфсизлик чоралари доирасидаги кескин қадам сифатида баҳоламоқда.
