Кеча, 22 июнь куни Россия армияси Украина ҳарбийларининг ўқув полигонига ракета зарбасини берди. Бу ҳақда Украина Қуролли кучлари Қуруқликдаги қўшинлари қўмондонлиги маълум қилди.
Расмий тарқатган маълумотларга кўра, зарба оқибатида камида 3 нафар ҳарбий ҳалок бўлган, яна 11 нафари яраланган. Таҳлилчилар бу воқеани Украина армияси учун оғир зарба сифатида баҳоламоқда, айниқса уруш шароитида ҳар бир тайёрланган ҳарбий – олтиндек қадрли бўлиб турган пайтда.
Қўмондонлик матбуот хизматининг хабар беришича, ҳужум механизациялашган бригадалардан бирининг машғулот пайтида содир бўлган. Аммо зарба қайси вилоятда амалга оширилгани очиқланмади.
Бироқ Украина ижтимоий тармоқларида фаол бўлган “Николаевский Ванек” номли Telegram канали бу ҳужум Николаев вилоятида содир бўлганини иддао қилмоқда. Бу манба кўпинча расмийлар билан яқин алоқада бўлиши билан танилган.
Қайд этиш жоизки, бу – июнь ойида Украина полигонига тўртинчи марта ракета зарбаси берилиши. 1 июнь куни Днепропетровск вилоятидаги яна бир полигонга уюштирилган ҳужумдан сўнг, Украина Қуруқликдаги қўшинлари қўмондони генерал-майор Михаил Драпатий истеъфога чиққан эди.
Украина ҳарбий қўмондонлиги зарбалардан сабоқ чиқарадими ёки бу яна навбатдаги оғир хатоликми – бу ҳозирча очиқ қолмоқда. Аммо факт шуки: ҳарбий полигонлар нишонга айлангани — фронт ортидаги хавфсизликнинг тобора заифлашаётганидан дарак.
