Путин Ғалаба куни парадида НАТОни танқид қилди ва Украинадаги урушни “адолатли” деб атади. Унинг айтишича, Россия НАТО томонидан қўллаб-қувватланаётган “тажовузкор куч”га қарши курашмоқда.
Москвадаги Қизил майдонда ўтган парад бу йил хавфсизлик сабаб қисқартирилди. Илк бор оғир зирҳли техника ва баллистик ракеталар намойиш қилинмади. Шунга қарамай, ҳарбийлар қатнашган парад кучайтирилган хавфсизлик остида ўтди.
Путин нутқида Иккинчи жаҳон уруши қаҳрамонларини эслаб, Украинадаги “махсус ҳарбий операция” қатнашчилари улардан руҳланаётганини айтди.
Тадбирда Беларусь раҳбари Александр Лукашенко, Малайзия қироли Султон Иброҳим ва Ўзбекистон президенти Шавкат Мирзиёев ҳам қатнашди. ЕИдан эса фақат Словакия бош вазири Роберт Фицо келди.
Параддан кейин Россия мудофаа вазирлиги Украинани уч кунлик сулҳни бузганликда айблади. Украина ҳозирча бу ҳақда изоҳ бермади.
