Европа Иттифоқи украиналик болаларнинг депортация қилиниши юзасидан янги санкциялар тайёрламоқда. Бу ҳақда Zamon.uz хабар берди.
Нашрнинг дипломатик манбаларининг билдиришича, янги чекловларни 12 май куни Брюсселда бўлиб ўтадиган Европа Иттифоқи Ташқи ишлар кенгаши йиғилишида тасдиқлаш режалаштирилган. Санкциялар украиналик болаларни депортация қилиш ва мажбурий кўчириш жараёнларига алоқадор шахслар ҳамда тузилмаларга таъсир қилади. Айни пайтда Европа Иттифоқининг шундай санкциялари 100 дан ортиқ жисмоний ва юридик шахсга қўлланилган.
Европа Иттифоқининг ҳисоб-китобларига кўра, Россия Украинага қарши кенг кўламли уруш бошланганидан бери 20 мингдан ортиқ украиналик болани ноқонуний депортация қилган ёки мажбуран кўчирган.
Брюссел Москвани болаларни руслаштиришга уринишда, жумладан, уларни мажбурлаб Россия фуқаролигига ўтказиш, рус оилаларига топшириш, мафкуравий таъсир қилиш ва ҳарбийлаштиришда айбламоқда.
