Тунис суди собиқ президент Монсеф Марзукийни сиртдан 22 йилга озодликдан маҳрум қилди. У президент Кайс Саиднинг ашаддий танқидчиси сифатида давлат хавфсизлигига таҳдид солганликда айбланди. Бу ҳолат мухолифат орасида танқидчиларга нисбатан босим кучайганидан хавотирларни янада кучайтирди, дея ёзмоқда "Замон.уз".
2011–2014 йилларда президент бўлган Марзуки Саидни парламентни тарқатгани ва барча ҳокимиятни ўз қўлига олгани сабабли авторитар тузум ўрнатганликда айблаб келади. Саид эса буларни мамлакат барқарорлиги учун зарур чоралар деб ҳисоблайди.
Бу Марзуки учун чиқарилган учинчи ҳукм бўлиб, ўтган йили ҳам у саккиз йил ва бошқа ишлар бўйича тўрт йил қамоқ жазосига маҳкум этилган эди.
Шу куни эрталаб мамлакатнинг етакчи мухолифат партияси – Эннаҳданинг юқори мартабали вакили Саҳби Атиг ҳам пора олишда айбланиб, 15 йилга озодликдан маҳрум қилинди.
Апрель ойида эса яна бир гуруҳ мухолифат етакчилари, тадбиркорлар ва адвокатлар 66 йилгача бўлган қамоқ жазосига ҳукм қилинган эди. Бугунги кунда Тунисдаги кўплаб сиёсий лидерлар, жумладан, Озод Конституциявий партияси раҳбари Абир Муссий ва Эннаҳда етакчиси Рошид Ганнучи ҳам қамоқда қолмоқда.
Маълумот учун, Тунис Африканинг шимолида жойлашган давлат бўлиб, пойтахти — Тунис шаҳри. Расман араб тили давлат тили ҳисобланади. Бошқарув шакли — президентлик республикаси. Пул бирлиги — Тунис динори.
