АҚШ Суриядаги саккизта оператив базасидан учтасини ёпади ва мамлакатдаги ҳарбийлари сонини 2000 дан 1400 нафаргача қисқартиради. Бу ҳақда Американинг икки юқори мартабали амалдорига таяниб "The Associated Press" хабар берди.
Маълум қилинишича, Mission Support Site Green Village, MSS Euphrates ва яна бир кичикроқ объект базалари ёпилмоқда. Америкалик қўмондонлар 60 кундан кейин ҳарбийларни кўпроқ қисқартириш керакми ёки йўқлигини ҳал қилиши керак бўлади.
Экспертлар Сурияда камида 500 нафар америкалик аскар қолдиришни тавсия қилган, бироқ АҚШ президенти Доналд Трамп мамлакатда ҳар қандай америкалик аскар қолдирилишига “чуқур шубҳа билдирган”, деб ёзади НЙТ.
Ҳарбийлар сони камайишига қарамай, улар терроризмга, хусусан, ИШИДга қарши курашни давом эттириши таъкидланмоқда. АҚШ Суриядаги қўшинлари сонини 2023 йил 7 октябрда ҲАМАСнинг Исроилга ҳужумларидан сўнг оширган эди.
