Farmatsevtika eksporti 220 million dollarga yetdi Eksport tarkibida dori vositalarining ulushi atigi 7 foizni tashkil qilmogda
O‘zbekistonda farmatsevtika sohasida eksport hajmi 220 million dollarga yetgan bo‘lsa-da, uning atigi 7 foizi dori vositalari hissasiga to‘g‘ri kelmogda. Mamlakatdagi 58 ta dori ishlab chiqaruvchi korxonaning barchasi milliy GMP sertifikatini olgan.
Endilikda qimmat bozorlarga chiqish uchun korxonalarni YevroGMP talablariga moslashtirish zarurligi ta’kidlandi. 1 iyundan boshlab mahalliy ishlab chiqaruvchilarga YevroGMP sertifikatini olish xarajatining 50 foizi Savdoga ko‘maklashish jamg‘armasi hisobidan qoplanadi.
Shuningdek, mahalliylashtirish talablari sabab ayrim ishlab chiqaruvchilar davlat xaridlarida qatnasha olmayotgani qayd etildi. Hozirda 16 ta korxona mahalliylashtirish darajasi 30 foizga yetmaganligi uchun 178 turdagi dori va tibbiy buyumlarni davlat korxonalariga sota olmayapti. Shu bois 1 sentyabrgacha mahalliy mahsulot sertifikatiga ega tadbirkorlarga mahalliylashtirish darajasidan qat’iy nazar davlat xaridlarida ishtirok etishga ruxsat berilishi belgilandi.
