AQSh Bosh prokurori Pam Bondi Jeffri Epstein ishiga oid hujjatlarda qayd etilgan 300 dan ortiq mashhur shaxs va siyosatchi ismini ochiqladi. Bu haqda "New York Post" xabar berdi.
Gap Epsteinga nisbatan voyaga yetmaganlar bilan jinsiy savdo aylovlari bo‘yicha tergov materiallari haqida bormoqda. Bondining bildirishicha, 2025 yil 19 dekabrda belgilangan muddatga muvofiq ishga doir barcha hujjatlarni oshkor qilish jarayoni yakunlangan.
Ro‘yxatda qator taniqli siyosiy va jamoat arboblari bor. Ular orasida Bill Klinton, Hillari Klinton, Barak Obama, Mishel Obama, Kamala Harris, Jo Bayden, Prints Garri, Bill Geyts, Vudi Allen, Mark Sukerberg va Beyonse kabi shaxslar tilga olingani aytilmoqda.
Shuningdek, Bondi avvalroq federal xizmatlarni ishga doir minglab sahifalarni yashirganlikda ayblagan va unga to‘liq arxiv o‘rniga atigi 200 sahifa taqdim etilganini bildirgan edi.
Ma’lumotlarga ko‘ra, 19 dekabr kuni AQSh Adliya vazirligi tomonidan federal tergovga oid qolgan barcha materiallar e’lon qilingan. Ular 3 milliondan ortiq sahifa hujjat, 2 mingdan ziyod video va 180 mingga yaqin fotosuratni o‘z ichiga oladi.
Qayd etilishicha, ro‘yxatda ismning tilga olinishi shaxsning aybdorligini anglatmaydi — bu faqat tergov materiallarida qayd etilgan shaxslar ro‘yxati hisoblanadi.
Eslatib o‘tamiz, bundan bir necha kun oldin internetda Epstein tirik bo‘lishi mumkinligi haqidagi nazariya ham tarqalgan edi. Bunga go‘yoki u bilan bog‘liq bo‘lgan Fortnite akkaunti faolligi sabab sifatida keltirilgan. Gap littlestjeffti taxallusi bilan ochilgan profil haqida bormoqda.
