Toshkent viloyati hokimligining “Yagona buyurtmachi xizmati” davlat muassasasi direktori o‘rinbosari xizmat mavqeidan foydalanib, pudratchi tashkilot foydasiga qor chiqartirish evaziga 7 ming AQSh dollari miqdorida pora olgan vaqtida Davlat xavfsizlik xizmati xodimlari tomonidan qo‘lga olindi.
Ma’lum qilinishicha, u “Shaffof qurilish” tizimi orqali 2 mlrd 73 mln so‘mlik kapital ta’mirlash obyekti bo‘yicha 1,1 mlrd so‘m bonak o‘tkazib bergani uchun avval 2 ming dollar, keyin esa penya undirish haqidagi da’vodan voz kechitirish evaziga yana 5 ming dollar olgan. Unga nisbatan Jinoyat kodeksining 210-moddasi bilan jinoyat ishi qo‘zg‘atilib, “qamoq” ehtiyot chorasi qo‘llandi.
Shuningdek, Toshkent viloyati Ekologiya va atrof muhitni muhofaza qilish boshqarmasi tuman bo‘limlaridan birining rahbari ko‘p yillik daraxtlarni kesishga ruxsat berish evaziga 3 ming AQSh dollari olgan vaqtida ashyoviy dalillar bilan uslandi. Ushbu mansabdorga nisbatan ham pora olish moddasi bilan jinoyat ishi ochildi.
Namangan viloyati Pop tumanida esa mahalla hokim yordamchisi davlat zaxirasidagi 90 sotix yer maydonini olib berishni va’da qilib, tadbirkordan 4500 AQSh dollari olgan. Keyinchalik va’da qilingan ishni bajara olmaganligi sabab mablag‘ning bir qismini qaytargan vaqtida DXX va Bosh prokuratura huzuridagi Departament xodimlari tomonidan uslandi. Hozirda unga nisbatan firibgarlik moddasi bilan jinoyat ishi qo‘zg‘atilib, tergov harakatlari olib borilmogda.
