Rossiyalik teleboshlovchi Vladimir Solovyov "Solovyov Live" ko‘rsatuvida Armaniston va Markaziy Osiyoni Rossiyaning "ta'sir zonasi" deb atab, ushbu hududlarning "yo‘qolishi" milliy xavfsizlikka tahdid solishini aytgan. U, shu asosda, Rossiya ta'sir doirasida deb hisoblangan boshqa mintaqalarda ham harbiy amaliyotlar o‘tkazilishi mumkinligini istisno etmagan.
Mazkur bayonotlar ijtimoiy tarmoqlarda keskin muhokamalarga sabab bo‘ldi. Ularga munosabat bildirgan "Milliy tiklanish" partiyasi yetakchisi Alisher Qodirov rus shovinistik chiqishlar yangilik emasligini, bunday provokatsiyalarga sovuqqonlik bilan yondashish lozimligini ta'kidladi.
Uning so‘zlariga ko‘ra, Rossiya OAVlaridagi bunday da'vatlar ikki davlat o‘rtasidagi strategik sheriklik ruhiga zid bo‘lib, munosabatlarga salbiy ta'sir ko‘rsatmoqda. Qodirov Markaziy Osiyo xavfsizlik va barqarorlik hududi ekanligini, qondosh davlatlar har qanday tajovuzga birgalikda javob berishga qodirligini qayd etdi.
"Solovyovning samarasiz chiqishlari uning ojizligi va zaifligidan dalolat beradi, holos", — deya xulosa qildi Alisher Qodirov.
