Rossiyada qamoq jazosidan qutulish evaziga Rossiya—Ukraina urushida qatnashgan andijonlik fuqaroga sud hukmi o‘qildi.
Aniqlanishicha, Andijon shahrida yashovchi I.X. 2022 yilning dekabr oyida ishlash maqsadida Rossiya Federatsiyasiga borib, Moskva va Chelyabinsk shaharlarida “Yandeks” platformasi orqali yetkazib berish xizmati bilan shug‘ullangan. I.X. 2023-yilning yanvar oyida giyohvandlik vositalari noqonuniy muomalasi bilan bog‘liq jinoyat uchun Rossiya Federatsiyasi huquqni muhofaza qiluvchi organlari tomonidan qo‘lga olingan va Chelyabinsk shahar sudi hukmi bilan 8 yil muddatga ozodlikdan mahrum etilgan.
Jazoni o‘tash jarayonida u Rossiya va Ukraina o‘rtasida davom etayotgan qurolli to‘qnashuvlarda ishtirok etish orqali jazodan qutulish imkoniyati borligi haqida taklif olgan va 2024 yilning avgust oyida Rossiya Qurolli kuchlari bilan shartnoma tuzib, oddiy askar sifatida harbiy xizmatga kirishgan. O‘sha yilning avgust–sentabr oylarida Donetsk shahrida olib borilgan janglarda o‘ziga biriktirilgan AK-74 o‘qotar quroli bilan ishtirok etgan. Janglardavomida snaryad portlashi oqibatida og‘ir tan jarohatlari olgan.
Sud-tibbiy ekspertizasiga muvofiq, ayblanuvchi umumiy mehnat qobiliyatining uchdan biridan ko‘prog‘ini doimiy ravishda yo‘qotgan, chap oyog‘iga “Ilizarov” apparati o‘rnatilgan. Jaroxatlardan so‘ng I.X. Rossiya Federatsiyasiga qarashli harbiy gospitalarda uzoq muddat davolangan.
2025 yilning sentyabr oyida I.X. O‘zbekiston Respublikasining konsullik hujjatlari asosida Andijonga qaytib kelgan.
Jinoyat ishlari bo‘yicha Jalaquduq tuman sudi tomonidan I.X. Jinoyat kodeksining 154-moddasi 1-qismida nazarda tutilgan jinoyatni sodir etganlikda aybli deb topildi. Unga nisbatan 5 yil muddatga ozodlikdan mahrum qilish jazosi tayinlandi. Biroq Jinoyat kodeksining 72-moddasiga asosan mazkur jazo shartligiga almashtirilib, unga 2 yillik sinov muddati — ozodlikni cheklash (uy qamog‘i) jazosi belgilandi.
