Inson aʼzolari savdosida gumon qilinayotgan Ukraina fuqarosi Polsha hududidan Qozogʻistonga ekstraditsiya qilindi. Bu haqda Zamon.uz nashri xabar berdi.
Maʼlumotlarga koʻra, usbu ayol 2017–2018 yillarda inson aʼzolarining noqonuniy oldi-sotdisi bilan shugʻullangan xalqaro uyushgan jinoyiy guruh tarkibida faoliyat olib borgan. Tergov materiallarida qayd etilishicha, jinoyiy guruh tirik insonlarning tana aʼzolari savdosi boʻyicha jami 56 ta noqonuniy bitimni amalga oshirgan.
Mazkur bitimlar doirasida transplantatsiya amaliyotlari Qozogʻistonning sogʻliqni saqlash muassasalarida oʻtkazilgani aniqlangan. Gumonlanuvchi joriy yil mart oyida Polshada qoʻlga olingan.
Polsha huquq-tartibot organlari taqdim etgan maʼlumotlarga koʻra, jinoyiy guruh faoliyati oqibatida Qozogʻiston, Armaniston, Ozarbayjon, Ukraina, Qirgʻiziston, Tojikiston, Oʻzbekiston hamda Tailandning jami 56 nafar fuqarosi jabrlangan va ulardan buyraklar noqonuniy ravishda olib qoʻyilgan.
Hozirda mazkur holat yuzasidan tergov harakatlari davom ettirilmoqda.
