U yillar davomida ijtimoiy, xayriya va ekologik yo‘nalishdagi loyihalarga boshchilik qilib, mamlakatta inklyuziv muhit yaratishga hissa qo‘shib kelmoqda.
Ziroat Mirziyoyeva 1964 yil 4 dekabr kuni Farg‘ona viloyatining Qo‘qon shahrida tug‘ilgan. Yoshlikda Toshkent irrigatsiya va melioratsiya institutida tahsil olgan, aynan shu yerda bo‘lajak turmush o‘rtog‘i — hozirgi prezident Shavkat Mirziyoyev bilan tanishgan.
Oilada uch farzand voyaga yetgan: to‘ng‘ich qizi Saida 1984 yilda, ikkinchi qizi Shahnaza 1986 yilda tug‘ilgan. Kenja farzandi — Miralisher — 2009 yilda dunyoga kelgan. Ziroat Mirziyoyeva bugungi kunda 6 nabiraning buvisidir.
Birinchi xonim 2020 yildan buyon "Zamin" xalqaro jamoat fondi vasiylik kengashi raisi sifatida faoliyat yuritib, ijtimoiy himoyaga muhtoj qatlamlarga ko‘maklashish, ayollarni qo‘llab-quvvatlash, ekologiya va iqlim o‘zgarishi bilan bog‘liq tashabbuslarni amalga oshirib kelmoqda. Fond dastlabki yillarda 5 mingdan ortiq ayolga yordam ko‘rsatgan.
Ziroat Mirziyoyeva xalqaro maydondagi tashriflarda ham faol. Uning ilk xorijiy safari Xitoyga to‘g‘ri kelgan. Keyingi yillarda Turkiya, Qatar, Ozarbayjon kabi davlatlarda tashkil etilgan yirik forum va sammitlarda ishtirok etgan. O‘tgan oy esa Prezident Mirziyoyev bilan birgalikda Bokuda bo‘lib o‘tgan COP29 sammitida qatnashdi.
U 2023 yilda Toshkentda o‘tkazilgan Iqtisodiy hamkorlik tashkilotining 16-sammiti doirasida xorijiy birinchi xonimlarni "Bolalar va yoshlar harakatda — Markaziy Osiyoda iqlim o‘zgarishi" xalqaro forumiga mezbonlik ham qilgan.
Mirziyoyeva oilaviy hayotdagi soddagina lavhalari bilan ham jamoatchilikka tanish. Ba’zan farzandlari ijtimoiy tarmoqlarda oilaviy suratlarni ulashadi. 2022 yilda qizi Shahnaza onasining norin tayyorlayotganini aks ettirgan fotosuratni e’lon qilgan, bu esa ijtimoiy tarmoqlarda keng muhokama bo‘lgan edi.
