Emmuanel Makron boshchiligidagi Fransiyada siyosiy tanglik sharoitida yangi hukumat e'lon qilindi. Ko'plab vazirlar o'z lavozimlarini saqlab qoldi.
Fransiya prezidenti Emmuanel Makron 5 oktyabr kuni mamlakatda yangi hukumat shakllantirilganini e'lon qildi. Bu haqda France 24 xabar bermoqda.
Yangi hukumat bosh vaziri etib tayinlangan Sebastyan Lekornu Makronning yettinchi bosh vaziri bo'ldi. U parlamentdagi siyosiy keskinlik fonida muxolifat bosimiga duch kelishi mumkinligi aytilmoqda.
2017–2024 yillarda iqtisodiyot vaziri bo'lgan Bruno Le Mer endilikda mudofaa vazirligi lavozimini egallaydi. Iqtisodiyot vaziri sifatida esa Roland Leskyur tayinlangan.
Tashqi ishlar vaziri Jan-Noel Barro, ichki ishlar vaziri Bruno Retayo, adliya vaziri Jerald Darmanin va madaniyat vaziri Rashida Dati o'z lavozimlarida qoldi. Shunga qaramay, Rashida Dati 2026 yilda korruptsiya bo'yicha sudga tortilishi kutilmoqda.
Fransiyada hozirda siyosiy tanglik hukm surmoqda. Davlat xarajatlarini qisqartirish va ijtimoiy ta'minotdagi o'zgarishlarga qarshi noroziliklar kuchaygan. 2 oktyabr kuni butun mamlakat bo'ylab yuzlab shaharlarda ish tashlashlar o'tkazilib, Eyfel minorasi vaqtincha yopilgan edi.
