Moskvaning shimolida qurilayotgan ko‘p qavatli turarjoy majmuasida yuz bergan kuchli yong‘in oqibatida 8 kishi halok bo‘ldi, 13 nafar inson jarohatlandi. Qutqaruvchilar 200 dan ortiq kishi binoda bo‘lgan bo‘lishi mumkinligini bildirmoqda.
28 aprel kuni 2-Ambulatoriya yo‘li, 14-uy manzilida joylashgan qurilish maydonida yong‘in chiqqan. Dastlab olov binoning 2 va 3-qavatlarini qamrab olgan.
Hodisa vaqtida yong‘inga eng yuqori — 5-darajali murakkablik berilgan, keyinchalik u 4-darajaga tushirilgan. Yong‘in umumiy hisobda 1,4 ming kvadrat metr maydonni qamrab olgan.
Rossiya Favqulodda vaziyatlar vazirligi ma’lumotiga ko‘ra, yong‘inni o‘chirishga 120 nafar qutqaruvchi va 30 ta texnika jalb etilgan. Hozirgi ma’lumotlarga ko‘ra, 31 kishi binodan chiqarib olingan.
Hodisa bo‘yicha Rossiya Jinoyat kodeksining 216-moddasi 3-qismi bilan jinoyat ishi qo‘zg‘atilgan. Yong‘inning aniq sababi hozircha ma’lum emas.
