Eron Hormuz bo‘g‘ozi orqali savdo kemalari harakatini tiklash bo‘yicha o‘z shartini e’lon qildi. Bu haqda mamlakat Mudofaa vazirligi vakili general Rizo Talayniq bayonot bergan. Bu haqda Zamon.uz ma’lum qildi.
Unga ko‘ra, mintaqadagi mojaro yakunlanganidan so‘ng savdo flotining Hormuz bo‘g‘ozi orqali to‘siqsiz harakati faqat Eron xavfsizligiga tahdid tug‘dirmagan taqdirdagina qayta tiklanadi.
Rasmiy vakilning ta’kidlashicha, bo‘g‘oz orqali xalqaro savdo kemalari qatnovi bo‘yicha yakuniy qaror mintaqadagi xavfsizlik holati va Eron manfaatlari inobatga olingan holda qabul qilinadi.
Avvalroq Eron Islom Respublikasi tashqi ishlar vaziri Abbos Aroqchi 25–26 aprel kunlari Islomobod shahrida bo‘lib o‘tgan muzokaralar davomida Pokiston vositachilari orqali AQSh tomoniga bo‘g‘ozni ochish hamda urushni tugatishga doir taklifni yetkazgani xabar qilingan edi.
