Qozogʻiston va Oʻzbekiston qoʻshma harbiy mashgʻulotlar oʻtkazadi

Qozoqʻiston va Oʻzbekiston muntazam ravishda qoʻshma harbiy mashgʻulotlar oʻtkazishga kelishib oldi. Bu haqda Qozoqʻiston bosh vaziri Oljas Bektenov imzolagan hujjatda qayd etilgan. Kelishuvga koʻra, mashgʻulotlar ikki davlat hududida navbatma-navbat oʻtkaziladi. Unda quruqlik qoʻshinlari, harbiy aviatsiya va maxsus texnika ishtirok etadi. Shartnoma doirasida chegaradan harbiy kolonnalarning oʻtishi, poligonlardan foydalanish hamda tibbiy va texnik taʼminot masalalari tartibga solinadi. Hujjat 5 yil muddatga tuzilgan boʻlib, tomonlardan biri rad etmasa, avtomatik tarzda uzaytiriladi. Rasmiylarga koʻra, kelishuvning maqsadi mintaqada xavfsizlikni mustahkamlash va ikki davlat armiyalari oʻrtasidagi hamkorlikni kuchaytirishdir.