56 yoshli tajribali murabbiy Paulo Bento Oʻzbekiston milliy terma jamoasini boshqarish boʻyicha taklifni qabul qilmadi. Bu haqda Portugaliyaning "A Bola" nashri xabar berdi.
Maʼlumotlarga koʻra, mutaxassis Oʻzbekiston Futbol Assotsiatsiyasi bilan muzokaralarda ishtirok etgan, biroq taqdim etilgan shartlar uning faoliyatidagi navbatdagi bosqich uchun kutilgan darajaga toʻgʻri kelmagan. Shu sababli, Bento taklifni rad etgan.
Eslatib oʻtamiz, Bento 2010–2014 yillarda Portugaliya termasiga, 2018–2022 yillarda Janubiy Koreya termasiga bosh murabbiylik qilgan. U joriy yil mart oyida BAA termasidagi ishini yakunlagan edi. Ayni paytda Oʻzbekiston terma jamoasi "CAFA Nations Cup" musobaqasida qatnashmoqda va jamoada vaqtincha Timur Kapadze rahbarlik qilmoqda.
