Bugun, 29 avgust kuni Prezident Shavkat Mirziyoyev Toshkent shahrida joylashgan “Yangi O‘zbekiston” bog‘iga tashrif buyurib, Mustaqillik monumenti poyiga gulchambar qo‘ydi.
Mazkur obida O‘zbekiston tarixidagi muhim voqealar, buyuk alloma va sarkarda ajdodlarimiz siymosi bilan bezatilgan bo‘lib, u xalqimiz mustaqilligining ramzi sifatida qad rostlagan.
Monumentning eng yuqori qismida joylashgan Humo qushi esa O‘zbekiston gerbi va milliy qadriyatlar timsoli sifatida talqin etiladi.
“Bu ulug‘ obida ona Vatanimiz, jasur, mehnatkash va tinchliksevar xalqimiz sha’niga bag‘ishlangan”, — degan edi davlat rahbari avvalroq.
Tantanal marosimda Oliy Majlis palatalari, Prezident Administratsiyasi, Vazirlar Mahkamasi hamda Toshkent shahri jamoatchiligi vakillari ishtirok etdi.
