Ijtimoiy tarmoqlarda Mozori Sharif shahrida buyuk mutafakkir Alisher Navoiy haykalining buzib tashlanganigi jamoatchilik e‘tiborini tortdi.
Hodisa yuzasidan O‘zbekiston Tashqi ishlar vazirligi zudlik bilan Afg‘oniston hukumat vakillari bilan bog‘lanib, rasmiy izoh oldi.
Afg‘oniston tomonidan bergan ma’lumotga ko‘ra, haykal o‘rnatilgan joy alloma xotirasiga munosib emas deb topilgan va yangi, ko‘rkam yodgorlik majmuasi qurilishi rejalashtirilayotgani bois haykal mahalliy hokimiyat tomonidan olib tashlangan.
Shu bilan birga, buzish ishlari Afg‘oniston Madaniyat va axborot vazirligi hamda jamoatchilik bilan kelishilmaganligi ta’kidlangan va usbu holat yuzasidan afg‘on tarafdan taassuf bildirildi.
Afg‘oniston hukumati Alisher Navoiy nomini abadiylashtirish bo‘yicha aniq choralar ko‘rishga va’da berdi.
Jumladan, yangi yodgorlik barpo etilishi, atrofi obodonlashtirilishi, shoir ijodiga oid ma’lumotlar tiklanishi va majmua joylashadigan maydonga Alisher Navoiy nomi berilishi rejalashtirilgan.
Afg‘oniston tomoni buyuk mutafakkir xotirasini munosib saqlashga qat’iy sodiqligini bildirgan.
