Namangan viloyatida bir guruh noqonuniy yo‘l bilan daromad topayotgan soxta “dindorlar” qo‘lga olindi. Bu haqda DXX D.uz ga xabar berdi.
Ma’lum qilinishicha, viloyat ichki ishlar boshqarmasi hamkorligida o‘tkazilgan tezkor tadbir davomida Namangan shahri, Yangi Namangan tumani, Uychi, To‘raqo‘rg‘on va Namangan tumanlarida bir qator soxta dindorlar qo‘lga olingan.
Jumladan, Namangan shahrining Baliqchi ko‘chasida ko‘p qavatli uylarning birida 15 nafar shaxsga diniy saboq berib kelgan va Ma’rifat mahallasida yashovchi ayol o‘z xonadonida
14 nafar voyaga yetmagan bolalarga diniy o‘qish tashkil etib, ularning har biridan oyiga 1,5 million so‘mdan pul olib kelgan.
Yangi Namangan tumanida qayd etilgan holatda esa 1983 yilda tug‘ilgan shaxs yashirin “hujra”da 10 nafar voyaga yetmagan qizlarga va 3 nafar fuqaroga diniy ta’lim berib kelgan.
Yana shu kabi holat, Uychi, To‘raqo‘rg‘on va Namangan tumanlarida ham kuzatilgan.
Hozirda soxta “dindorlar” hamda bolalarni tarbiyalash majburiyatlarini bajarmagan ota-onalarga nisbatan tegishli choralar ko‘rilgan.
