2025 yil 3 avgust kuni “Bild am Sonntag” nashri “Putin bilan hisob-kitob qilayotgan fantom qiz” sarlavhali maqolani e’lon qildi.
Unda Germaniya jurnalisti Rossiya prezidenti Vladimir Putinning norasmiy qizi deb taxmin qilinayotgan Luiza Rozovaga Instagram orqali murojaat qilgani, so‘ng esa u Rozovaning Telegram-kanaliga qo‘shilgani aytiladi.
Mazkur kanalda Rozova o‘zining Putin bilan bog‘liqligi haqidagi tanqidlarga javob bergani haqida yoziladi.
Bild maqolasi Rozovadan quyidagi iqtiboslarni keltirgan edi:
“Men o‘z oilamning harakatlari uchun javobgarmanmi, ular meni eshitmasalar ham?”
Yana bir iqtibosda Rozova: “Men sevimli Peterburgim bo‘ylab yura olmayman. Sevimli joylarimga borishga ham jur’atim yetmaydi,” degani qayd etiladi.
Ammo oradan bir kun o‘tib, 4 avgust kuni maqola saytdan olib tashlandi. Bild nashri buni quyidagicha izohladi: “Turli internet-kanallarda maqoladagi bayonotlar soxta akkauntga tegishli bo‘lishi mumkinligi haqida shubhalar bildirildi.” Nashr ta’kidlashicha, Rozova nomidan yuritilgan akkaunt “haqiqiyidan ajratib bo‘lmas darajada” bo‘lgan.
Shunga qaramay, maqola chop etilgungacha Germaniyaning o‘ndan ortiq nashrlari Rozova haqida xabarlar tarqatishga ulgurgan edi.
2020 yilda Putinning maxfiy oilasi haqida surishtiruv olib borgan jurnalist Andrey Zaxarov Rozovaning Instagramdagi hisobi ham soxta bo‘lishi mumkinligini taxmin qildi. Biroq u maqolada keltirilgan suratlar haqiqiy bo‘lishi ehtimoli katta ekanini ham tan oldi.
Eslatib o‘tamiz, iyun oyi boshida Meduza nashri Luiza Rozovaning Parijda yashayotgani va zamonaviy san’at bilan shug‘ullanuvi L Galerie galereyasida ishlayotgani haqida yozgandi.
Nashr suhbatdoshlariga ko‘ra, u ish joyida o‘zini Yelizaveta Rudnova deb tanishtiradi. Rudnov familiyasi Rossiya prezidentining 2015 yilda vafot etgan yaqin do‘stiga tegishli ekani ma’lum. Mazkur galereyada, shuningdek, urushga qarshi san’at namunalari ham namoyish etiladi.
