Jizzax viloyatida bedarak yo‘qolgan ikki yoshli bolaning jasadi topildi. Bu haqda Bosh prokuratura matbuot xizmatiga tayanib Darakchi.uz xabar berdi.
Ma’lum qilinishicha, bola Xorazm viloyati Urganch shahrida istiqomat qilgan va ota-onasi bilan Jizzax viloyati Zomin tumaniga, xususan, Duoba qishloq fuqarolar yig‘ini hududiga mehmonga kelgan. U 2024 yil 5 iyul kuni soat 19:30 larda noma’lum tomonga chiqib ketgan va o‘shandan beri bedarak deb hisoblanardi.
Bolani topish maqsadida mahalliy aholi, huquqni muhofaza qiluvchi organlar hamda ko‘ngillilar jalb etilgan, shuningdek, uni topgan shaxsga 20 million so‘mlik mukofot puli e’lon qilingandi.
Qidiruv ishlari natijasida bolaning jasadi Zomin tumanidagi O‘riklisoy qishlog‘idan 1,5 kilometr uzoqlikdagi tog‘ yo‘lida jarohatlar bilan topildi.
Bosh prokuratura ma’lumotlariga ko‘ra, bola mahalliy aholiga mansub avtomashina haydovchisi tomonidan tasodifan orqaga haydalgan avtomobil bilan urib ketilgan. Haydovchi bola nafas olmayotganini aniqlagach, jasadni yashash uyi yaqinidagi daraga olib borib tashlagan.
Hodisa yuzasidan O‘zbekiston Respublikasi Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bo‘yicha jinoyat ishi qo‘zg‘atildi. Dastlabki tergov harakatlari Jizzax viloyati Ichki ishlar boshqarmasi huzuridagi tergov bo‘limiga topshirildi.
Ma’lumot uchun, mazkur moddaga ko‘ra, transport vositasidan foydalanish qoidalarini buzib, inson o‘limiga sabab bo‘lgan shaxs 7 yilgacha ozodlikdan mahrum qilinishi mumkin.
Eslatib o‘tamiz, bu kabi holatlar avval ham kuzatilgan. Xususan, 2024 yil iyulida Toshkentda bedarak yo‘qolgan 6 yoshli bolaning jasadi suv to‘la quduqdan topilgan edi. 2023 yil martida esa Samarqandda yo‘qolgan bola bir yildan so‘ng jonsiz holda aniqlangandi.
