Ijtimoiy tarmoqlarda O‘zbekiston fuqarolari tomonidan turli xil qonunbuzarliklar sodir etilayotgani to‘g‘risida xabarlar tarqalmoqda. O‘zbekistonning Qozon shahridagi Bosh konsulxonasi holat yuzasidan ma’lumot berdi.
Unga ko‘ra, konsulxona o‘zining konsullik okrugiga kiruvchi hududlarida O‘zbekiston fuqarolari bilan sodir bo‘layotgan holatlarni sinchkovlik bilan kuzatib, har biriga aniqlik kiritish, fuqarolarga konsullik-huquqiy yordam ko‘rsatish va ularni manfaatlarini himoya qilishga qaratilgan zarur tadbirlarni amalga oshirib kelmoqda.
Ijtimoiy tarmoqlarda tarqalgan mazkur holatlar bo‘yicha olib borilgan surishtiruvlar natijalariga va Rossiya Federatsiyasi vakolatli organlari va mutasaddi tashkilotlari tomonidan Bosh konsulxonaning rasmiy so‘rovnomalariga yo‘llangan javoblariga ko‘ra, Tatariston Respublikasi va Samara viloyatida sodir bo‘lgan noxush voqealarda O‘zbekiston fuqarolari tomonidan ushbu jinoyatlar sodir etilmagani ko‘rsatilib, fuqarolarning ishtiroki to‘g‘risidagi xabarlar o‘z tasdig‘ini topmagan.
