Ижтимоий тармоқларда Жиззахда эскирган симёғочлар қулаши оқибатида чорва молларини ток уриши сабабли уларнинг ҳалок бўлгани акс этган расм тарқалди. Ҳолатга "Ҳудудий elektr тармоқлари" АЖ Жиззах ҳудудий филиали расмий муносабат билдирди.
Ҳолат оммалашиб, унга айрим тармоқ фаоллари ўзларининг шахсий фикрини ҳам билдирди.
Кўриб қўрқиб кетдим, чунки аҳоли яшайдиган қишлоқларда бунақа эски симёғочлар жуда ҳам кўп. Энг ёмони, у ерларда чорва эмас одамлар, болалар яшашади, — дея ёзади “Тасниф” агентлиги раҳбари Лазиз Ҳамидов.
Шунингдек, у постини қуйидагича якунлаган.
“Эскирган инфратузилмани янгисига алмаштириш учун электр энергийси нархи оширилганди, одамлар шунга кўнди, улар тўлаяпти. Шунга яраша уларга тезроқ янги трансформаторлар, янги симёғочлар ўрнатиб бериш керак деб ўйлайман”.
Расмий изоҳда ҳудуддаги ссурункали ёмғир ва кучли шамол натижасида электр тармоғида носозлик юзага келган. Мазкур авариявий ҳолат туман электр таъминоти бўлими ходимлари томонидан тезкорлик билан бартараф этилиб, ҳозирда ҳудудда электр энергияси узатилиши тўлиқ тикланган.
Фуқаро томонидан билдирилган 3 бош чорва молининг нобуд бўлиши билан боғлиқ моддий зарарни қоплаш масаласи бўйича шуни маълум қиламизки, амалдаги қонунчиликка мувофиқ, кўрилган ҳақиқий зарарни баҳолаш ва уни ундириш масалалари ваколатли суд органлари томонидан ҳал этилади.
Шу муносабат билан, мурожаат эгасига барча қонуний тартиб-тамойиллар ҳамда низони суд тартибида кўриб чиқиш ҳуқуқлари юзасидан тегишли ҳуқуқий тушунтиришлар берилди.
