Ўтган йили юртимизда ақида илмининг асосчиси Абу Мансур Мотуридий таваллудининг 1155 йиллиги кенг нишонлангани муносабати билан Самарқанд шаҳридаги Чокардиза қабристони ҳудудида мажмуа қайта таъмирланиб, ободонлаштириш ишлари бошланган эди.
Ҳозирда умумий майдони 26 гектар бўлган ҳудудда мажмуа қайта қурилмоқда. Бу ерда 250 ўринли масжид, кириш пештоқи, илмий марказ, кутубхона, музей ва автотураргоҳ барпо этилмоқда. Шунингдек, қурилиш жараёнида Чокардиза қабристонида буюк фақиҳ Бурҳониддин Марғиноний дафн этилган жой аниқланиб, унда мақбара қурилмоқда.
Президент бунёдкорлик ишларини кўздан кечириб, мажмуа дунё мусулмонлари учун муҳим зиёрат маскани эканини таъкидлади ва замон талабларига мос шароит яратиш зарурлигини қайд этди.
“Мажмуага келган киши аввало Имом Мотуридий бобомизнинг илмий-маънавий мероси ва ислом оламида тутган мавқеи ҳақида ёрқин тасаввурга эга бўлиши, алломанинг маърифатпарвар қарашлари бугун ҳам долзарблигини ҳис қилиши керак”, деди Президент.
Шунингдек, қурилишни сифатли ва ўз вақтида бажариш, ҳудудда яшил майдонларни кўпайтириш юзасидан тегишли топшириқлар берилди.
