Санкт-Петербургда фаррош бўлиб ишлаётган Ўзбекистон фуқароси Хайрулло Ибадуллаев еттинчи қаватдан қулаган болани ушлаб қолиб, унинг ҳаётини сақлаб қолди.
Ҳодиса 22 февраль куни содир бўлган. Етти ёшли бола дераза токчасига чиқиб, пастга қулаб тушган. Шу пайт ҳовлида бўлган эркак югуриб бориб, болани ушлаб қолган ва ўз танаси билан зарбани юмшатган. Оқибатда бола ва уни қутқарган эркак шифохонага ётқизилган.
Ушбу воқеадан сўнг, Шавкат Мирзиёев Хайрулло Ибадуллаевни “Жасорат” медали билан тақдирлаш тўғрисидаги фармонни имзолади. Шунингдек, унга Россия томонидан ҳам бир миллион рубль миқдорида пул мукофоти берилиши маълум қилинди.
Қаҳрамон эса ўзини қаҳрамон деб ҳисобламаслигини, у учун энг муҳими боланинг омон қолгани эканини айтган.
