Вазирлар Маҳкамасининг 9 апрель куни қабул қилинган қарорига кўра, Тошкент шаҳри ва вилоятидаги иссиқхона хўжаликлари иқлим шароити қулай бўлган Сурхондарё вилоятига кўчирилади ҳамда улар молиявий қўллаб-қувватлаш ва замонавий инфратузилма билан таъминланади.
Шунингдек, Тошкент вилоятидаги иссиқхоналарга табиий газ етказиб бериш тўлиқ тўхтатилади, кўмир ва мазут ёқиладиган янги иссиқхоналар қурилишига рухсат берилмайди. Солиқ ставкалари эса юқори коэффициентларда ҳисобланади.
Бўшаган ер майдонларида интенсив боғдорчилик, узумчилик, кўчатчилик ёки “яшил боғлар” барпо этишга рухсат берилади. Давлат мулкидаги иссиқхоналарда эса капитал қурилиш ишлари тақиқланади.
2026 йил 1 июндан бошлаб Юқори Чирчиқ, Қибрай, Янгиўл, Зангиота ва Тошкент туманларида кўмир, мазут ва бошқа зарарли ёқилғилардан фойдаланадиган янги иссиқхоналарни рўйхатдан ўтказишга рухсат берилмайди. 2026 йил 1 августдан эса бу ҳудудларда иссиқхоналарга табиий газ етказиб бериш тўлиқ тўхтатилади.
Шунингдек, сув ресурслари учун тўловлар саноат корхоналари учун белгиланган тарифнинг 5 баравари миқдорида ҳисобланади. Ер солиғи ва мол-мулк солиғи эса амалдаги базавий ставкаларга нисбатан 10 бараваргача оширилган тарзда қўлланади.
