Санкт-Петербург шаҳридаги Петрозаводская кўчасида етти ёшли бола уйнинг еттинчи қавати карнизига чиқиб қолган. Қўшнилар уни хонага қайтишга чақирган, аммо бола жавоб бермаган. Бир неча сониядан сўнг у мувозанатни йўқотиб, пастга қулаган.
Шу пайт уй олдида ишлаётган, Ўзбекистонда туғилган Хайрулло исмли эркак очиқ ойна ёнида болани аввалроқ пайқаган. Боланинг ташқарига чиқмоқчи бўлаётганини англаган у яқинлашиб, вазиятни кузатган.
Хабарда айтилишича, бола боши билан пастга қулаётган пайтда фаррош уни ҳавода ушлаб қолиб, бағрига босган ва зарбани юмшатган. Кейин у болани подъездга олиб кириб, қўшнилар тез ёрдам чақиргунча уни ҳушига келтиришга ҳаракат қилган.
Бола омон қолган, ҳозир реанимацияда, аҳволи барқарор деб баҳоланмоқда. Хайрулло ҳам енгил тан жароҳатлари олган, аммо оғир шикастлар қайд этилмаган.
Ҳодиса ҳақида дастлаб ExpressAsia хабар берди. Нашр таъкидлашича, бу воқеа бошқача якун топиши мумкин эди, аммо Марказий Осиёдан бўлган оддий ишчининг жасорати бола ҳаётини сақлаб қолди.
