Президент Шавкат Мирзиёев раислигида ўтаётган видеоселектор йиғилишида сунъий интеллектни ривожлантиришга оид янги ташаббуслар эълон қилинди. Унга кўра, Ўзбекистондаги барча туман ва шаҳар ҳокимлари ҳузурида рақамлаштириш ва сунъий интеллект бўйича маслаҳатчи лавозими жорий қилинади.
Шунингдек, барча вазирлик ва идораларда сунъий интеллект билан шуғулланувчи алоҳида бўлинма ташкил этилиши, уларнинг ишига самарадорлик ва хизмат сифатини ошириш, бюрократия ва яширин иқтисодиётни қисқартириш каби вазифалар юкланиши белгиланди.
Йиғилишда юқори натижаларга эришган, хорижий тилларни биладиган 100 нафар мутахассисни АҚШ, Европа, Сингапур ва Япония каби давлатларга махсус 6 ойлик курсларга юбориш режалаштирилгани ҳам маълум қилинди.
Келаси йилдан бошлаб эса вазирлик ва ҳудудларда сунъий интеллектни жорий этиш даражасига қараб махсус рейтинг баҳолаш тизими ишга тушади.
