Instagram ижтимоий тармоғи 18 ёшгача бўлган фойдаланувчилар учун махсус “13+” чеклов тизимини жорий этилмоқда. Бу тизим АҚШда фильмлар учун ишлатиладиган “ПГ-13” рейтингига ўхшаш бўлади ва ота-оналарга фарзандларини янада яхшироқ назорат қилиш имконини беради.
Мета бу ўзгаришлар орқали вояга етмаганларга номақбул контентлар — қўпол сўзлар, гиёҳвандликка оид саҳналар, спиртли ичимликлар, шунингдек, зўравонлик ва шаҳвоний контентларни чекламоқчи.
Янги тизимга 18 ёшдан кичик фойдаланувчилар автоматик тарзда 13+ созламаларга ўтказилади. Бу созламани фақат ота-онанинг рухсати билан ўзгартириш мумкин бўлади. Баъзи қидирув сўзлари (масалан, алкоголь), ҳатто хато ёзилган бўлса ҳам, блокланади.
Тизим дастлаб АҚШ, Буюк Британия, Австралия ва Канадада ишга тушади. Европа ва бошқа мамлакатларга эса келаси йил етиб бориши режалаштирилган. Баъзи мутахассислар бу ўзгаришлар етарли эмаслигини айтмоқда. Айрим тадқиқотларда Инстаграмдаги хавфсизлик воситаларининг 64 фоизи самарасиз деб топилган. Мета эса бу даъволарни рад этади.
