ЎФА биринчи витсе-президенти Равшан Эрматов 2025−2029 йиллар учун ФИФАнинг Футболда технологиялар, инновациялар ва рақамли ривожланиш қўмитаси раис ўринбосари этиб тайинланди. Қўмита инновацион ечимларни синовдан ўтказиш ва футболга жорий этиш устида иш олиб боради.
Тарихда илк бор ўзбекистонлик футбол мутахассислари ФИФА (Халқаро футбол федерациялари ассоциацияси) қўмитасига тайинланди. Бу ҳақда Ўзбекистон футбол ассоциацияси матбуот хизмати маълум қилди.
Қайд этилишича, ташкилот кенгашининг қарори билан ЎФА биринчи витсе-президенти Равшан Эрматов 2025−2029 йиллар учун ФИФАнинг Футболда технологиялар, инновациялар ва рақамли ривожланиш қўмитаси раис ўринбосари этиб тайинланди.
Қўмита футболни замонавий технологиялар орқали ривожлантиришга қаратилган энг муҳим тузилмалардан бири ҳисобланади.
У VAR, голни аниқлаш технологияси, яримавтоматик офсайд тизими, рақамли мониторинг, сунъий интеллект каби инновацион ечимларни ривожлантириш, синовдан ўтказиш ва футболга жорий этиш устида иш олиб боради.
Шунингдек, ЎФА бош котиби Аваз Максумов Соҳил футболи қўмитасига, ЎФА аёллар футболини ривожлантириш бўлими бошлиғи Юлия Панина Аёллар миллий терма жамоалари ўртасидаги мусобақалар қўмитасига тайинланди.
Эрматов аввалроқ Осиё футбол конфедерацияси ҳакамлар қўмитаси раисининг 2023−2027 йиллар учун ўринбосари бўлганди.
