Тошкент вилояти Оҳангарон шаҳрида ички ишлар органи ходимига нисбатан 14 ёшли қиз билан боғлиқ ёлғон хабар тарқатган шахс 7 суткага қамалгани ҳақида 2-май куни ИИББ матбуот хизмати маълум қилди.
Маълум қилинишича, у интернетда тарқатган ахборотини ёлғон эканини тан олган.
Суд қарорига кўра, у ва икки шериги Маъмурий жавобгарлик тўғрисидаги кодекснинг 183, 194 ва 195-моддалари бўйича айбдор деб топилиб, 7 суткага маъмурий қамоқ жазосига ҳукм қилинган.
“Ҳолатда вояга етмаган қизнинг иштироки бўлгани сабабли, тўлиқ тафсилотлар ҳозирча очиқланмаган. Иш якунига кўра, ёлғон ахборот тарқатган шахсларга нисбатан маъмурий, оғир оқибатларга олиб келган тақдирда жиноий жавобгарлик чоралари кўрилади”, дейилади хабарда.
Ҳолат юзасидан текширувлар давом этмоқда. Шунингдек, ёлғон ахборот тарқатиш ва бошқа қонунбузарликлар бўйича қўшимча тергов ҳаракатлари олиб борилмоқда.
