6 октябрь куни соат 09:00 ҳолатига кўра, Тошкент шаҳри дунё шаҳарлари орасида ҳаво сифати бўйича энг ифлос шаҳарга айланди. Бу ҳақда IQAir портали маълумотларида қайд этилган.
Пойтахт ҳавосидаги майда PM2.5 зарарли зарралар концентрацияси 59,8 мкг/м³ ни ташкил этди. Бу меъёрдан бир неча баробар юқори ҳисобланади ва саломатлик учун хавфли даражада.
Мутасаддилар аҳолига зарурат бўлмаса кўчага чиқмаслик, ниқоб тақиш, уй шароитида тозаликка риоя қилишни тавсия қилмоқда. Эшик ва деразаларни маҳкам ёпиш, хонада чанг тўпланмаслиги учун нам тозалаш ишларини кунига бир неча бор амалга ошириш зарур.
Эслатиб ўтамиз, бундан аввалроқ — 22 сентябрь куни ҳам Тошкент шунга ўхшаш анти-рекордни қайд этган эди.
