Жорий йилнинг 8 ойи давомида скутерлар иштирокидаги ЙТҲларда 50 дан зиёд одам ҳалок бўлган.
Билдирилишича, ушбу давр мобайнида скутер ва мопед сингари транспорт воситалари иштирокида 300 дан ортиқ йўл-транспорт ҳодисаси содир этилиб, 53 нафар фуқаро вафот этган, 259 таси тан жароҳати олган.
2025 йилнинг 1 октябргача мопед ва скутер ҳайдовчилари ҳайдовчилик гувоҳномасига эга бўлиши, ушбу транспорт воситалари эса давлат рўйхатидан ўтган бўлиши лозим.
Бунда двигателининг иш ҳажми 25 см ва ундан ортиқ, лекин 50 см дан ошмайдиган, шунингдек, электр двигателининг қуввати 0,25 киловатт ва ундан ортиқ, бироқ 4 киловаттдан ошмайдиган, конструктив тезлиги соатига 25 километр ва ундан ортиқ, лекин 50 километрдан ошмайдиган транспорт воситалари, яъни мопед ва скутерлар учун алоҳида давлат рақами белгилари олиниши ҳамда давлат рўйхатидан ўтказилиши керак.
Аввалроқ Халқ демократик партияси ушбу қарорга қарши чиққанди. Таъкидланишича, ҳозирда 130 минг нафарга яқин ёшлар велосипед, мопед ва скутерлар орқали курьерлик хизмати билан шуғулланмоқда. Уларнинг асосий даромади шу соҳа орқали шаклланади.
