Маросим Жоге орденида бўлиб ўтди. Тадбир давомида инсон-роҳиб роботдан: “Муқаддас таълимотга ўзингни бағишлашга тайёрмисан?» дея сўраган. Робот эса: “Ҳа, мен унга ўзимни бағишлашга тайёрман”, деб жавоб берган.
Шундан кейин руҳоний устоз робот учун махсус мослаштирилган бешта буддавий қоидани тушунтирган. Улар орасида ҳаётни ҳурмат қилиш ва зарар етказмаслик, бошқа роботларни бузмаслик, инсонларга қулоқ солиш ва уларга қарши чиқмаслик, сўзда ҳам, ҳаракатда ҳам алдамаслик, энергияни тежаш ҳамда ортиқча қувват олмаслик каби тамойиллар борлиги айтилган. Сўнг роботга буддавийча «Габи» номи берилган.
Агентлик маълумотига кўра, Габи оддий диндорлар учун мўлжалланган қасамёдни қабул қилган. Бироқ у яқин орада ибодатхонада “фахрий роҳиб” сифатида хизмат қила бошлайди.
Жоге орденининг маданият масалалари бўйича масъул роҳиби Сон Воннинг айтишича, улар талаффузи осон, бироз эски услубдаги ва Будданинг меҳр-шафқатини дунёга ёйишга ёрдам берадиган исм танлашни истаган.
Унинг фикрича, робот учун ишлаб чиқилган ушбу беш тамойил келажакда одамлар ва машиналарнинг тинч-тотув яшаши учун асос бўлиши мумкин.
Маросим давомида робот «қўллари»ни олдида бирлаштириб турган, роҳибларга таъзим қилган ва улардан тасбеҳ қабул қилиб олган. Одатда роҳибликка қабул қилинаётган инсон қўлларини ладон тутуни ёнида бироз куйдириш маросими ўтказилади. Аммо роботга бунинг ўрнига махсус стикер ёпиштирилган. Габи шунингдек роҳиблар кийимини ҳам кийган эди.
Режаларга кўра, у яна учта робот билан биргаликда Будда таваллуди муносабати билан ўтказиладиган лотос чироқлари фестивалида иштирок этади.
