Marosim Joge ordenida bo‘lib o‘tdi. Tadbir davomida inson-rohib robotdan: “Muqaddas ta’limotga o‘zingni bag‘ishlashga tayyormisan?” deb so‘ragan. Robot esa: “Ha, men unga o‘zimni bag‘ishlashga tayyorman”, deb javob bergan.
Shundan keyin ruhoniy ustoz robot uchun maxsus moslashtirilgan beshta buddaviy qoidani tushuntirgan. Ular orasida hayotni hurmat qilish va zarar yetkazmaslik, boshqa robotlarni buzmaslik, insonlarga quloq solish va ularga qarshi chiqmaslik, so‘zda ham, harakatda ham aldamaslik, energiyani tejash hamda ortiqcha quvvat olmaslik kabi tamoyillar borligi aytilgan. So‘ng robotga buddaviycha «Gabi» nomi berilgan.
Agentlik ma’lumotiga ko‘ra, Gabi oddiy dindorlar uchun mo‘ljallangan qasamyodni qabul qilgan. Biroq u yaqin orada ibodatxonada “faxriy rohib” sifatida xizmat qila boshlaydi.
Joge ordenining madaniyat masalalari bo‘yicha mas’ul rohibi Son Vonnning aytishicha, ular talaffuzi oson, biroz eski uslubdagi va Buddaning mehr-shafqatini dunyoga yoyishga yordam beradigan ism tanlashni istagan.
Uning fikricha, robot uchun ishlab chiqilgan ushbu besh tamoyil kelajakda odamlar va mashinalarning tinch-totuv yashashi uchun asos bo‘lishi mumkin.
Marosim davomida robot «qo‘llari»ni oldida birlashtirib turgan, rohiblarga ta’zim qilgan va ulardan tasbeh qabul qilib olgan. Odatda rohiblikka qabul qilinayotgan inson qo‘llarini ladon tutuni yonida biroz kuyldirish marosimi o‘tkaziladi. Ammo robotga buning o‘rniga maxsus stiker yopishtirilgan. Gabi shuningdek rohiblar kiyimini ham kiygan edi.
Rejalarga ko‘ra, u yana uchta robot bilan birgalikda Buddaning tavalludi munosabati bilan o‘tkaziladigan lotos chiroqlari festivalida ishtirok etadi.
