O'zbekiston Soliq qo'mitasida blogerlar faoliyati, ularning huquqiy maqomi hamda reklama orqali olinayotgan daromadlarni soliqqa tortish masalalariga bag'ishlangan uchrashuv bo'lib o'tdi. Bu haqda qo'mita matbuot xizmati xabar qildi.
Ma'lum qilinishicha, blogerlar faoliyatini o'rganish doirasida sohaning eng faol 110 nafar vakili ro'yxatga olingan. Tahlillar natijasida ularning 55 nafari o'zini o'zi band qilgan shaxs sifatida, 33 nafari yakka tartibdagi tadbirkor sifatida ro'yxatdan o'tgani aniqlangan. Qolgan 22 nafar esa jismoniy shaxs maqomida faoliyat yuritmoqda.
Soliq qo'mitasiga ko'ra, bu holat blogerlarning amaldagi faoliyati ko'lami bilan ularning huquqiy maqomi o'rtasida muayyan nomuvofiqlik mavjudligini ko'rsatadi.
Shuningdek, 3 milliondan ortiq obunachiga ega 6 nafar top-bloger faoliyati alohida tahlil qilingan. Qayd etilishicha, ular 2025 yil davomida jami 360 ta stories va 184 ta reklama posti joylashtirgan.
Elektron hisobvaraq-fakturalar orqali taqdim etilgan rasmiy hisobotlarga ko'ra, mazkur blogerlarning umumiy daromadi 2,7 milliard so'mni tashkil etgan. Ular tomonidan byudjetga 110,4 million so'm miqdorida soliq to'langan.
Uchrashuv davomida blogerlarga reklama joylashtirishdan olinadigan daromadlarni soliqqa tortish bo'yicha qonunchilik normalari tushuntirilgan. Xususan, o'zini o'zi band qilgan shaxs maqomi xodim yollash huquqini bermasligi, amalda esa ayrim blogerlar tomonidan administrator, yordamchi va boshqa mutaxassislar jalb qilinayotgani qayd etilgan.
Tomonlar sohaga oid qator masalalarni muhokama qilgan. Shu bilan birga, blogerlar uchun soliq majburiyatlari va huquqiy savodxonlikka bag'ishlangan o'quv tadbirlarini tashkil etish taklifi ham ilgari surilgan.
Soliq qo'mitasi blogerlar faoliyatini soliq qonunchiligi talablariga muvofiqlashtirish hamda daromadlar shaffofligini ta'minlash muhim ekanini ta'kidlagan.
