Bugun, 5 may kuni Samarqand viloyatining Samarqand shahrida joylashgan avtomobillarga yoqilg‘i quyish shoxobchalaridan birida yong‘in sodir bo‘ldi. Bu haqda Favqulodda vaziyatlar vazirligi viloyat boshqarmasi xabar berdi.
Ma’lum qilinishicha, soat 11:13 da Samarqand shahridagi Buyuk Ipak yo‘li ko‘chasida joylashgan AYoQShda yong‘in sodir bo‘layotgani to‘g‘risida xabar kelib tushgan.
Xabarga asosan, yong‘in-qutqaruv bo‘linmalari zudlik bilan voqea joyiga yetib borib, yong‘inni qisqa vaqt ichida to‘liq bartaraf etgan.
Qayd etilishicha, hodisa oqibatida jabrlanganlar yo‘q. Ayni paytda yong‘inning kelib chiqish sabablari va yetkazilgan moddiy zarar miqdori aniqlanmoqda.
Eslatib o‘tamiz, avvalroq Qo‘qon shahrida joylashgan xo‘jalik mollari do‘konida ham yong‘in sodir bo‘lgani haqida xabar berilgan edi.
