Navoiyda 14 nafar bolani olib ketayotgan Matiz YTHga uchradi

Navoiy viloyati Nurota tumanida 14 nafar bolani olib ketayotgan Matiz ishtirokida yo‘l-transport hodisasi sodir bo‘ldi. YHHX xabariga ko‘ra, avtohalokat oqibatida avtomobilni boshqarib ketayotgan oilaviy bog‘cha rahbari shifoxonada vafot etgan. Ma’lum qilinishicha, hodisa 5-may kuni ertalab yuz bergan. Nurota tumanidagi oilaviy bog‘chalardan biriga rahbarlik qilgan 34 yoshli ayol 13 nafar tarbiyalanuvchi hamda o‘zining 3 oylik chaqalog‘ini Matiz avtomobilida bog‘chaga olib ketayotgan bo‘lgan. Hodisa “Yangi hayot” MFY hududidan o‘tuvchi yo‘lining 8–9-kilometrlari oralig‘ida yuz bergan. 1992-yilda tug‘ilgan G.Q. tegishli hujjatlarsiz Matiz avtomobilini boshqarib ketayotib, tajribasizligi va chalg‘ishi oqibatida rul boshqaruvini yo‘qotgan. Oqibatda avtomobil yo‘lning chap tomoniga chiqib ketib, ag‘darilgan. Hodisa oqibatida ayol vafot etgan, avtomobildagi bolalar esa turli darajadagi tan jarohatlarini olgan. Hozirda bir nafar bolaning ahvoli og‘ir bo‘lib, koma holatida ekani aytilmoqda. Yana 8 nafar bola viloyat markazidagi shifoxonaga olib ketilgan. Kun.uz manbasiga ko‘ra, bolalarni tashigan er-xotin yillar davomida avtomobilni haydovchilik guvohnomasisiz boshqarib kelgan. Bolalar muntazam ravishda shu tarzda uydan bog‘chaga va bog‘chadan uyga olib borilgan. Ota-onalar ham bu holatga e’tiroz bildirmagani aytilgan.