Бугун, 9 сентябрь куни Непал Молия вазири Бишну Прасад Паудел намойишчилар томонидан калтакланди. Бу ҳақда Zamon.uz нашри хабар берди.
Маълум қилинишича, 65 ёшли Пауделнинг Катманду кўчаларида қочиб кетаётгани, унинг ортидан эса юзлаб одамлар қувиб келаётгани акс этган видео тарқалган. Қарама-қарши йўналишдан келаётган ёш намойишчилардан бири сакраб вазирни тепган, у мувозанатини йўқотиб, қизил деворга урилиб, йиқилган.
“Непал Молия вазири Бишну Прасад Паудел намойишчилар томонидан калтакланди”, дейилади нашр хабарида.
“Кҳабарҳуб” нашрига кўра, норозилик намойишлари чоғида собиқ бош вазир ва Конгресс партияси раҳбари Шер Баҳодур Деуба ҳамда унинг рафиқасига ҳам ҳужум қилинган. Намойишчилар Президент қароргоҳи ҳудудига ҳам кириб боргани айтилмоқда.
