Сўнгги кунларда ижтимоий тармоқларда “Метрода касса ходимлари ёппасига ишдан бўшатилади” мазмунидаги хабарлар тарқалди. “Тошкент метрополитени” ДУК ушбу ҳолат юзасидан расмий муносабат билдирди.
Ташкилот маълумотига кўра, йўловчиларнинг кўпчилиги автоматлаштирилган тўлов тизимларидан фойдаланаётгани сабабли, айрим бекатлардаги кассалар ёпилиб, ўрнига инфокиоскалар ўрнатилмоқда. Бугунги кунга келиб 23 бекатда 24 та QR-кодли чипта чиқарувчи инфокиоск ишламоқда. Жорий йил охиригача уларнинг сони 200 тага етказилади.
Шунингдек, кассалардаги тўлов тизимлари ўрнини қуйидаги замонавий усуллар эгалламоқда: ATTO транспорт карталари, Uzcard Duo, Humo, Visa, MasterCard, QR тўловлар, FacePay ва PalmPay тизимлари.
Кадрлар қисқартирилиши масаласига келганда, метрополитен бу борада ижтимоий масъулиятни ҳисобга олган. Ишдан бўшаётган ходимларга тўрт ойлик ўртача иш ҳақи миқдорида компенсация берилади. Шунингдек, уларнинг янги касб эгаллаши учун ўқув курслари харажатлари қопланади.
"Тошкент метрополитени” ДУК ОАВ ва фуқаролардан тасдиқланмаган маълумотларни тарқатмасликни сўраб, ёлғон хабарлар учун Маъмурий ва Жиноий кодексларда белгиланган жавобгарлик борлигини эслатди.
