So‘nggi kunlarda ijtimoiy tarmoqlarda “Metroda kassa xodimlari yoppasiga ishdan bo‘shatiladi” mazmunidagi xabarlar tarqaldi. “Toshkent metropoliteni” DUK usbu holat yuzasidan rasmiy munosabat bildirdi.
Tashkilot ma’lumotiga ko‘ra, yo‘lovchilarning ko‘pchiligi avtomatlashtirilgan to‘lov tizimlaridan foydalayotgani sababli, ayrim bekatlardagi kassalar yopilib, o‘rniga infokioskalar o‘rnatilmoqda. Bugungi kunga kelib 23 bekatda 24 ta QR-kodli chipta chiqaruvchi infokiosk ishlamoqda. Joriy yil oxirigacha ularning soni 200 tagga yetkaziladi.
Shuningdek, kassalardagi to‘lov tizimlari o‘rnini quyidagi zamonaviy usullar egallamoqda: ATTO transport kartalari, Uzcard Duo, Humo, Visa, MasterCard, QR to‘lovlar, FacePay va PalmPay tizimlari.
Kadrlar qisqartirilishi masalasiga kelganda, metropoliten bu borada ijtimoiy mas’uliyatni hisobga olgan. Isdan bo‘shayotgan xodimlarga to‘rt oylik o‘rtacha ish haqi miqdorida kompensatsiya beriladi. Shuningdek, ularning yangi kasb egallashi uchun o‘quv kurslari xarajatlari qoplanadi.
“Toshkent metropoliteni” DUK OAV va fuqarolardan tasdiqlanmagan ma’lumotlarni tarqatmaslikni so‘rab, yolg‘on xabarlar uchun Ma’muriy va Jinoyiy kodekslarda belgilangan javobgarlik borligini eslatti.
