“Қўрқинчли жазолар” деб танилган айбловлар ортидан танқид остида қолаётган Чеченистон суди Зарема Мусаэвани яна деярли 4 йилга озодликдан маҳрум қилди.
Расмий версияга кўра, у колониядан шифохонага кўчирилишдан норозилик билдирган ва Федерал жазони ижро этиш хизмати (ФСИН) ходими Бекбулатовни урган ҳамда тирнаган.
Аммо ҳимоя томони бу версияни рад этмоқда. Мусаэванинг адвокати Александр Савиннинг сўзларига кўра, айбловлар асоссиз — воқеа гувоҳлари йўқ, бошқа маҳкумлар эса Зареманинг даволанишдан мамнун бўлганини билдирган.
Зарема эса ўзини айбдор деб ҳисобламаяпти ва жисмоний ҳолати туфайли ходимга ҳужум қила олмаслигини айтмоқда.
Зарема Мусаэва — Қозоғистондан фаолият юритаётган мухолифатчилар Иброҳим ва Абубакр Янгулбоевларнинг онаси.
У 2022 йилда Нижниж Новгороддаги уйидан куч билан олиб кетилган ва 2023 йилда ҳокимият вакилига куч ишлатганлик айби билан 5,5 йилга озодликдан маҳрум этилганди. Кейинчалик жазоси 4 йил 9 ойга қисқартирилган.
2024 йил май ойида Европа Инсон ҳуқуқлари суди Мусаэва фойдасига қарор чиқариб, унга 52 минг евро компенсация тўлашга ҳукм қилган эди.
Суд Россия ҳукумати бир нечта инсон ҳуқуқлари бўйича конвенция моддасини бузганини қайд этган.
