Олий Мажлиснинг Инсон ҳуқуқлари бўйича вакили (Омбудсман) томонидан 2024 йилда Тошкентдаги Республика кузатув кучайтирилган руҳий касалликлар шифохонасида ўтказилган мониторинг давомида қатор камчиликлар аниқланган эди.
Шундан сўнг, Соғлиқни сақлаш вазирлигига расмий тақдимнома киритилиб, муассасадаги ҳолатни яхшилаш чораларини кўриш сўралди.
Вазирлик тақдимномага жавобан шифохона учун махсус назорат режаси ишлаб чиқди ҳамда камчиликларни белгиланган муддатларда бартараф этишни ваъда қилди.
Шу билан бирга, шифохона эҳтиёжлари учун давлат бюджетидан 1 миллиард 670 миллион сўмдан ортиқ маблағ ажратилди.
Яқинда Омбудсманнинг Тошкент шаҳридаги вакили томонидан шифохонага қайта мониторинг ўтказилди.
Унда айрим камчиликлар бартараф этилгани, лекин баъзиларининг устида ишлаш давом этаётгани қайд этилди. Омбудсман офиси мониторинг натижаларини доимий назоратда ушлаб туришини билдирди.
