Россия Молдовани ўз назоратига олишни хоҳламоқда — мамлакат президенти Майя Санду
Кишинёвда Молдова Олий хавфсизлик кенгаши йиғилиши бўлиб ўтди. Унда мамлакат президенти Майя Санду парламент сайловларига Россия томонидан аралашув бўлиши мумкинлиги ҳақида огоҳлантирди, деб хабар бермоқда ТV8 телеканали.
"Россия куздан бошлаб Молдова Республикасини назоратга олишни хоҳлаяпти ва сентябрдаги парламент сайловларга мисли кўрилмаган аралашувга тайёргарлик кўрмоқда. Москва бу мақсадда турли сиёсий лойиҳаларга сармоя киритиб, ўз одамлари орқали парламентга киришга интилмоқда", — дея аниқлик киритди президент.
Санду бу контекстда ҳозирда Молдова ҳудудидан ташқарида бўлган россияпараст бизнесмен Илан Шор назоратидаги тармоқни тилга олди.
19 июль куни Молдова Марказий сайлов комиссияси Шор билан боғлиқ бўлган “Победа” (“Ғалаба”) блокига 28 сентябрга белгиланган парламент сайловларида қатнашиш учун рўйхатдан ўтишга рад жавобини берган эди.
Бундан ташқари, Молдова президенти Telegram мессенжерини ҳам танқид остига олди. Чунки Telegram маъмурияти Молдова расмийларининг сўровларига жавоб бермаяпти. Сандунинг таъкидлашича, айнан шу мессенжер норозилик акцияларини уюштириш ва ёпиқ гуруҳлар орқали овозларни сотиб олиш схемаларини молиялаштириш учун фойдаланилмоқда.
