Бугун, 23 июль куни Тошкент вилояти Қибрай туманида жойлашган яшаш уйи ва қурилиш моллари дўконида ёнғин содир бўлди. Бу ҳақда Фавқулодда вазиятлар вазирлиги маълум қилди.
Қайд этилишича, ҳолат соат 10:50 да "Ғ.Ғулом" МФЙ, "А.Навоий" кўчасида жойлашган яшаш уйи ва қурилиш моллари дўконида юз берган.
Ёнғинни ўчириш учун 5 та ёнғин-қутқарув экипажлари соат 10:57 да воқеа жойига бориб, 11:17 да ўраб олинган ва ёнғин соат 11:50 да тўлиқ ўчирилган.
“Ёнғин ортидан тан жароҳати олганлар тўғрисида мурожаат келиб тушмаган.Ҳозирда ёнғин сабаби ва зарари аниқланмоқда”, — дейилади хабарда.
Эслатиб ўтамиз, аввалроқ Тошкентдаги омборхонада йирик ёнғин содир бўлганди. Ёнғин 3 соат давом этиб, сўнг бартараф этилган.
